Nutiziale culturale

“1943 Le Cap Corse dans les combats de la libération”, u novu libru d'Albert Mattei

Altu libru omagiu à a resistenza corsa, st’opera mette in risaltu, grazia à l’archivii di prima trinca, a storia d’una reta di resistenti capicursini. L’autore hà intesu durante parechje decennie i so membri è ste testimunianze sò cusì precise chì si puderebbe pensà chì Albert Mattei era cun elli ma hè natu solu in u 1948. Hè statu dinù merre di u paese di Cagnanu. St’omi anu participatu à i cumbatti di Liberazione. Eranu diretti da Jean Marcantoni è anu salvatu a pupulazione di Cagnanu. Cù i so cumpagni, anu attaccatu un gruppu d’alemani è dopu anu patutu ripresaglie maiò. Anu participatu à tutti i cumbatti long’à a costa contr’à a terribule Waffen SS è l’armata regulare d’Hitler. Sti fatti sò cuntati in u libru d’Albert Mattei.
Sò evucati dinù l’arrestazione di resistenti, l’interrugatoriu di Jean Marcantoni da un ufficiale di a Wehrmacht. St’interrugatoriu hè un capitulu passiunante di l’opera. Prupone à u lettore nant’à quasi vinti pagine una ritrascrizzione cumpleta di u scambiu. L’autore hà pussutu ritrascrivelu grazia à archivii tenuti da a figliola di Jean Marcantoni. Albert Mattei hà parlatu dinù cun ellu. L’occasione di mustrà u valore è u curagiu di prima trinca di sti resistenti corsi. U libru hè esciutu durante l’anniversariu di l’80 anni di a liberazione di a Corsica. Una cuincidenza felice. Albert Mattei hà vulsutu trasmette sti ricordi è ste testimunianze à e e nostre generazione future.