Nutiziale culturale

“Bastia chì storia !” documentariu di Petru Paulu de Casabianca

Petru Paulu de Casabianca, insignante à u cullegiu di Biguglia, hà scrittu è realizatu un documentu nant’à a cità di Bastia, dipoi a so fundazione à i ghjorni d’oghje. Ci offre una passarella trà i seculi, per una visione inedita di a storia di Bastia, cità unica in Corsica. Un documentariu in lingua corsa, di 52 minuti, intitulatu “Bastia chì storia !”. Grazia à ellu, s’ampara chì ùn hè micca una cità genuvese ma fundata pè u più da i Corsi, chì a chjesa di a Cuncezzione era a sede di u parlamentu di u reame di Corsica. In quant’à a chjesa Santa Croce, hè unica in Francia. Sappiate dinù chì a torra di u simbulu di Bastia ùn hè micca genuvese, chì ci era di più chjese barocche bastiacce chè in Roma à u 17u seculu. U filmu principia à a fine di u 14u seculu durante a fundazione di a cità è si compie à l’epuca attuale.

Stu documentariu porghje dunque infurmazione pè falla finita cù credenze false è altri rinsignamenti spessu scunnisciuti da i bastiacci elli stessi. L’opera prudutta da Dominique Tiberi serà diffusata da Télé Paese à principiu di l’annu cù a participazione di i storichi Antoine-Marie-Graziani, Jean-Marc Olivesi, Philippe Peretti, a guida cunferenzera Sylvie Casalta è l’architettu Sebastien Celeri. Cunteranu stalvatoghji chì anu fattu a cità. Per esempiu, Jean-Marc Olivesi evucheghja e rivalità trà i quartieri Terra Nova è Terra Vechja, trà u centru di a cità è i quartieri sudu, quella trà tutti i quartieri pè decurà e so chjese.