Nutiziale culturale

Raconte-moi Bastia 1978, edizione MS prod : u novu libru di Jacques Santucci

Jacques Santucci hà campatu da giovanu in l’universu di u pallò. Hè u figliulinu di Jacky Santucci chì hà datu so nome à u campu di ghjocu di Prupià. In u 2013, Jacques Santucci hè diventatu assistante d’edizione à Canal + è scunfinisce l’evenimenti maiò di u sportu . Dopu, à RMC Sport cum’è capu d’edizione, entre in i più famosi campi di ghjocu di u mondu è frequenteghja e più grande squadre. Infine entre à BFM TV. In u 2022, volta in Corsica è cullabureghja cù un novu canale di sportu africanu. In u 2023, travaglia pè Amazon Prime nant’à numerosi scontri è organiseghja parechje interviste di tercani. In stu filu, apre a sucetà di pruduzzione MS Prod è decide di rivene nant’à l’epupea bastiaccia in u 1978.

À parte da una seria di podcast, hà vulsutu creà un libru 100% corsu pè fà scopre à i più giovani sta perioda o ritruvalla à i passiunati, i nustalgichi. Avemu dodeci capituli cuntenendu stalvatoghji, e testimunianze passiunate di Fanfan Félix, Johnny Rep, Charles Orlanducci, Paul Marchioni, Jean-Marie De Zerbi, Merry Krimau, Félix Lacuesta, u gurdianu Pierrick Hiard o Marc Antoniotti. L’autore mette dinù in risaltu l’intusiasmu chì cresce in Bastia trasfurmendula in locu di festa è di speranza dopu à ogni vittoria. Stu sustegnu pupulare diventa u mutore di a squadra rinfurzendu a sulidarità trà i ghjucadori è u publicu corsu. A stagione 1977-1978 principia cù speranze mudeste ma prestu a squadra vince contr’à famose squadre europee (Torino, Newcastle è u Sporting Lisbonne). L’apoteosa hè u ghjornu di a finale. Ancu sì u SECB ùn l’hà micca vinta contr’à u PSV Eindhoven, a cità è a so squadre sò diventate legende. U racontu descrive ogni scontru cum’è una battaglia eroica cundutta da i Johnny Rep, Claude Papi, l’allenadore Claude Cahuzac. Sta prova maestra entre in a memoria cullettiva cum’è un simbulu di resistenza è d’eccellenza. Raconte moi Bastia 1978 vi cunterà dinù un affrescu vivu di l’identità corsa, di i so valori, di a passione pè u sportu, a sulidarità, a descrizzione di Bastia è di i so abitanti in leia intima cù u Sporting.