Nutiziale culturale

“Toponymie du littoral de Corse”, u novu libru di Roger Miniconi

Roger Miniconi hà scrittu u libru “Toponymie du littoral de Corse” à l’edizione Piazzola. Un travagliu di quasi 50 anni chì presenta a storia marittima di l’isula è di i so omi di mare. L’autore hè dinù oceanograffu, fundatore di e riserve di Scandula è di e Lavezzi. L’opera hà principiatu in u 1974 cù una racolta di toponimi ind’è testimoni. Cusì, Roger Miniconi hà pussutu arricchì a so tesa nant’à i parlà di i piscadori in a Corsica sana da Bunifaziu à Ersa, cù vucabularii assai sfarenti pè a listessa lingua.

Sò toponimi assai anziani, di u prelatinu, di l’epuca neolitica. Sta tupunimia liturale descrive l’ambiente ind’una visione da u mare versu a terra. Quandu i tupunimi sò anziani, ghjè capunanzu pè situassi in mare postu chì, tempi fà, ùn ci era carta. Ci amparanu dinù chì u nome Erbalonga ùn rimanda manc’appena à un’erba longa ma à l’arghja longa. Un’elevazione di terrenu isulata chì si vede da u mare pè ùn perdesi durante a navigazione. Difatti, u nome aghja ùn rimanda micca solu à un’aghja induve si tribbia u granu. D’altrò, u veru nome di I Sanguinari, hè Sanguinaghji, un locu in altezza culor di sangue.