Nutiziale culturale

A forza d'un tempu novu - La force d'un autre temps

Yvan Colonna hè trà a vita è a morte. In lu so core, un paese, una terra, un populu. Tanti è tante simu cummossi, in veghja, appesi à un filucciu di vita. Un altru pannu di dolu veste a Corsica. Unu di più. Chì u Signore l'aiuti à ritruvà u soffiu. È noi, femu ch'ellu venga u tempu di a verità nantu à issa scandalosa agressione stalvata in prigiò.

A suffrenza, u dulore ci puderanu aiutà à purtà un altru sguardu ? Quand'elli sò capiti, accolti cù empatia è intelligenza, ci ponu aiutà à cambià u sguardu. Stu sguardu chì ùn sclude mai a suffrenza di l'altru.

Un sguardu chì hà a forza di vede ogni suffrenza. Pè leghje è capì altrimente ciò chi ci accade. U trumatismu « Corsica – Francia », sta vechja ferita, sta tragedia mai capita, mai ricunnisciuta, ci intrappuleghja tutti è da i dui lati.

A nome di u dulore, pè rispettu di tante suffrenze, pè e lezziò di u passatu, l'averiamu issu curagiu, issa intelligenza d'un altru tempu ?