Nutiziale culturale

A seria documentaria Paoliwood

Sta seria diffusata nant’à Via Stella è in replay nant’à Internet conta in quindeci episodii a cerca di una squadra di televisione corsa pè truvà un famosu rializadore chì accetti di fà un filmu hollywoodianu nant’à a storia di Pasquale Paoli. Difatti, l’isula sana brama a rializazione di un filmu simule pigliendu cum’è mudellu Braveheart di Mel Gibson. Stu filmu evucheghja in modu rumanzatu a vita di William Wallace, eroe è simbulu di l’indipendenza scuzzese.

Paoliwood hè l’opera di Lionel Dumas-Perini, Julien Fontaine et Julien Valli. Senza aspettà l’esciuta di u filmu, a seria accorda digià una piazza di prima trinca à Paoli nant’à a scena audiovisiva. A so presenza nant’à France.TV li permette di fassi cunnosce è di parlà di u Babbu di a Patria fora di l’isula. I trè giovani speranu chì stu filmu si rializeghji un ghjornu.