Nutiziale culturale

A suciolinguistica, impegnu è utilità suciali. Novu libru di Niculau Sorba. Edizione Albiana 2022

Prima di truvà u so postu ghjustu ed efficace in u campu scentificu generale ma dinù in a pratica di e so utilità sucetale, hà straziatu parechji decennii a sociulinguistica ! Iè, hà straziatu à veru ma oramai pudemu esse rassirinati... Basta à sgrignà u studiu di Niculau è sentimu cullà un’aria fruttifera assai sia in u campu di e scenze sia ind’è l’azzione, l’atti linguaghjaghji ch’interessanu pedagugia è varie diciture, usuale è cumune o puru assai spezializate o di creazione literarie ed artistiche. Di fatti sinu à stu libru, à i sociulinguisti attenti à a cumplessità di a vita chì un spiritu sticchitu vole sempre spiccà in parechje discipline chjose, li ci hè vulsutu à scumbatte assai cù quellu scentisimu strettu, è spessu si saranu ancu... inzergati ! Invece avale, lighjendu à Sorba, ci hè propiu da rallegrà si sequitendu ogni parte di u spostu è e riferenze cumplette da u principiu sinu à oghje. Un inseme serenu, ammaestratu è chjaru, ducumentatu, descrittivu è criticu cumplettu. U lettore ci trova tutti i periudi è riferenze, cun analisi è ramenti precisi di i varii lochi è paesi duv’ella si hè scritta è rifinita a sociulinguistica, à livellu universale è po dinù in Corsica, bella sicura.

Ghjacumu THIERS