Nutiziale culturale

Anthologie des grands discours sur la Corse et les Corses

St'antolugia di 1000 pagine, sott’à a direzzione di Kévin Petroni è Christophe Luzi à l’edizione Classiques Garnier, cuncoglie è cummenta 114 famosi discorsi publichi da u XVIIIu seculu à a nostra epuca. Un'opera tamanta è originale risultatu d'un cantieru scientificu trasdisciplinariu cù 16 cercadori di l'Università di Corsica. Da a voce di Paoli in core di a guerra d'indipendenza à u discorsu d'Emmanuel Macron in Bastia in u 2018, 'u discorsu di a rumpitura' cù l'eletti naziunalisti. 

L’anthologie mette in risaltu u geniu di i Corsi in a retorica, u sensu di l’affari publichi. Palesa a diversità di i punti di vista è l’impurtanza di sti grandi discorsi spessu critichi contr’à e mancanze chì anu fattu soffre a Corsica in a so storia. Nanz’à ogni discorsu, ci hè un’intruduzzione è dopu un testu d’analisi fundendusi nant’à u rinculu di u tempu è u sguardu scientificu. Frà i discorsi analizati, u 'Munasteru di Curbara' di Maupassant ind’u capitulu cunsacratu à i raconti di viaghju, u 'Grande disturbu culturale' di Pascal Marchetti frà i discorsi nant’à a lingua corsa, quellu di l'abbate Casanova nant’à a religione cristiana, u discorsu di François Mitterrand quand’ella hè stata creata l'Università di Corsica, e 'lettere à i giovani Corsi' d'Edmond Simeoni, u discorsu d'investitura di Jean-Guy Talamoni in u 2015 davant’à l'Assemblea di Corsica.

L’autori sò storichi, geograffi, specialisti di e scienze di l’educazione, di a lingua è a cultura corsa, cercadori in scienze di gestione, economisti è ghjuristi. Leghje stu libru hè una manera di rivisità a storia di l’isula è, cù l’analisi, di falla finita cù certi sbaglii, false credenze. Infine, stu libru serà presentatu à l’universitarii in u Palazzu Naziunale di Corti u 12 di lugliu.