Nutiziale culturale

Isula Corsica Au cœur de la collection cartographique du musée de la Corse, edizione Albiana

Dapoi u libru di Frank Cervoni “image de la Corse, 120 cartes de la corse des origines à 1831,” editatu da La Marge in u 1989, ùn ci hè statu travagliu specificu nant’à a cartugrafia isulana. U museu di a Corsica avia presentatu u tema in u 2008 cù “Cartugrafià a Corsica in tempu di Pasquale Paoli” è dinù a mostra nant’à e figure di a Corsica. Avemu pussutu ammirà carte è piani di Corsica illustrendu parchje mostre è publicazione ma mancava sempre un travagliu precisu nant’à u sugettu. Per quessa, un prugettu edituriale hè statu iniziatu pè valurisà una cullezzione publica di prima trinca, cunservata à a CDC. 

Cusì, stu novu libru si scumparte in grande unità cronologiche pè capì l’evuluzione di e carte è piani. Ind’e numerose pruduzzione di u Mediterraniu, e riprisentazione di a Corsica mostranu l’impurtanza di l’isula è i so raporti cù l’altre sponde. U nostru territoriu bagna in parechji mari è à l’ingiru avemu terre cù culture diverse è varie. Ghjè un locu chì interessa i navigadori, viaghjadori dapoi a più alta antichità. In sta cartugrafia, si viderà l’evuluzione di e riprisentazione di a Corsica pè sbuccà nant’à u cuntornu precisu di l’isula à a fine di u XVIIIu seculu è a so situazione in u Mediterraniu occidentale. 

Infine, ci hè u piacè di l’ochji, di e carte è piani, disegni, culori è sin’à a scuperta di un’infurmazione, u nome di locu pè arricchì u nostru imaginariu è e cunniscenze di a persona chì leghje.