Nutiziale culturale

Aux origines de la tête de maure, u novu libru di Michel Vergé-Franceschi, edizione Albiana

L’origine di a bandera cù a so testa mora ferma un veru misteru. Ma cù stu novu libru Michel Vergé-Franceschi risponde à une poche di dumande. A testa serà quella d’un rè, d’un schjavu, d’un santu o d’un cursaru ? Dapoi quandu a Corsica hà stu simbulu nant’à e so arme ? Chì simbuliseghja ? Chì vene à fà u reame d’Aragone in l’affari corsi ? Perchè ci hè solu una duzina di famiglie isulane è à l’incuntrariu una centinaia di famiglie di Nordu di l’Europa chì l’anu messa nant’à e so arme ? Perchè Teodoru Primu, solu rè di Corsica, a porta cù l’ochji fasciati ? E perchè Pasquale Paoli decide di pisà a fasciola nant’à a fronte è chì oramai simbuliseghja a Corsica nant’à a bandera di a nazione ?

Di fronte à tante dumande, qualchì indiziu schjarisce i labirinti di a storia isulana. Ci risponde dunque l’autore Michel Vergé Franceschi, prufessore emeritu di l’Università, anzianu direttore di u laburatoriu di Storia è d'Archeolugia marittima di u CNRS à l’università di Parigi-IV Sorbonne, à u museu naziunale di a Marina, è anzianu presidente di a Cumissione francese di storia marittima.