Nutiziale culturale

Duie rime, nova racolta puetica di Paulu Vincentu Mucchielli

Stu librettu di puesie, à l'edizione 'Parti des oiseaux' tratta d’amore, d’umanisimu, di a vita persunale di l’autore, di viaghji o di a terra corsa. Hè un linguaghju chì leia di più l’omu. L’inseme hè aburdevule è capiscitoghju. Paulu Vincentu Mucchielli ùn hà micca vulsutu fà lu pumposu… In più, ghjè un sistema uttunariu chì si pò mette abbastanza bè in musica. U scrittore ghisunacciu hè prufessore di corsu dapoi più di trent'anni. Impegnatu à prò di a lingua, Paulu Vincentu l’hè dinò in u duminiu di a cultura -i dui vanu inseme – masimu u cantu. Facia parte di u gruppu di studienti « A Palatina » in l’anni ottanta, dopu « Viaghju » ma hè sopratuttu à l’origine di u sviluppu di a Scola di Cantu à u Fesch cù Natale Luciani è Santu Pasqualaggi.