Voce Nustrale

Nutiziale culturale

Corsica
9 d'ottobre

Gruppu Passione : l’alchimia di a pulifunia

Hè esciutu di ferraghju scorsu è sette anni dopu à u primu, u dischettu novu di u gruppu Passione. L’occasione di trattà d’un associu chì hà vulsutu piazzà l’amicizia trà i so membri nanzu à tuttu per cuncepisce, à pocu à pocu, canti d’eri è d’oghje à modu soiu…

A storia di u gruppu « Passione » hè cum’è tanti altri gruppi isulani, quella d’un’amicizia trà i so membri. Si principia in u 1999 in Appiettu cù qualchì passiunatu di cantu tradiziunale ma micca solu. À l’iniziu, ci hè Benedettu Rusterucci, ch’avia fattu sente a so voce linda cù a seconda squadra di « I Voci di a Gravona ». « Ci vuliami strutturà per metteci à u serviziu di u cantu tradiziunali, spiega u cantadore, erami per a maiò parti, ghjenti di u circondu. À pocu à pocu, ci semi allargati. »

Strada facendu, a squadra prupone cuncerti in Appiettu, u circondu è in altrò. Qualchì tempu dopu, s’arricchisce di Jean-Marc Ceccaldi, stallatu sottu à u Pichju. « Era dopu à un’emissione « U Live » induve aviamu cantatu inseme, spiega l’artistu, l’affare s’era accunciata di manera naturale. » U cantadore porta a so petra. « Semu prisenti nantu à e scene di Corsica è d’altrò, aghju solu vulsutu purtà a mo sperienza cù acconci musicali particulari è dinò d’altri strumenti cum’è u flautu irlandese o a mandulina... »

A ghjunta di Jean-Louis Blaineau, (Core di l’omi di Sartè), famosu cumpunitore, permette à u gruppu di francà un altru passu. Hè quì chè a squadra cumpone qualchì cantu di messa cum’è un kyrie è ancu un acconciu nantu à u Diu vi Salvi Regina. « Avemu l’amore di a pulifunia tradiziunale, aghjusta Jean-Marc Ceccaldi, iss’acconci quì sò più muderni ma arrimbati nantu un filu nustrale. »

S’ellu dà cuncerti da per tuttu in Corsica, u gruppu hè dinò prisente à prò di u suciale. Cù, per in dettu, un cuncertu di Natale in San Chirgu (Appiettu) induve face cantà i zitelli.

U percorsu di a squadra l’hà permessu, fora di i so cuncerti, di esce un primu dischettu, sette anni fà. « Ci era appena di tuttu ciò ch’è noi faciamu à l’epica, pulifunie, canzone tradiziunale, creazione... ».

Sette anni dopu, si tratta d’un secondu dischettu, esciutu di ferraghju. Frà tempu, a squadra hè scambiata postu ch’elli sò ghjunti Benjamin Rusterucci, figliolu di Benedettu (una manera di tramandà dinò), Rémy Bizzari è ancu Paulu Vincentu Mucchielli, monda cunnisciutu in u mondu culturale. Issa squadra nova prupone dodeci canti induve truvemu un filu particulare. « Ci hè sempre a tradizione ma avemu decisu di scopre, à tempu, orizonti novi (Blues, Gospel, musiche di u mondu...). Di fattu, ùn ci demu limite... »

Da « I passageri di notte » à « Fiacculella » passendu per « Kyrie di Ghisoni », « Nanna » per Lucia Stella » o « Monte Gozzi », u gruppu mette in valè a so sensibilità musicale è artistica. U dischettu di a maturità induve ci hè un filu à tempu tradiziunale è mudernu. Tuttu u mondu o guasgi, scrive, e cumpusizione sò dedicate à Jean-Marc Ceccaldi o Jean-Louis Blaineau ind’un inseme chì permette à u gruppu di cuntinuà una strada principiata vinti anni fà…

Ph.P.

 Indirizzu

Piazza Ghjuvanni Simonetti
20221 Cervioni

+04 95 38 12 83

 Rete suciale

Cuncezzione è realizazione Agence de communication L'Agenza