Cuncipitu da l’Università di Corsica in associu cù a piattaforma Gymglish, Gymcorsu permette st’arnese numericu di furmà si à a lingua corsa à distanza per via di un accessu di 15 minuti ogni ghjornu. U so scopu : accumpagnà i studienti chì amparanu u corsu è à mumenti ancu l’intraprese. Paria una fantasia qualchì annu fà, ma hè pussibule oramai d’amparà u corsu davant’à u so screnu d’urdinatore cù qualchì ascultadore. Dopu à « Imparà u corsu », u metudu d’amparera messu in u 2013 nant’à u situ Interromania di u centru culturale universitariu, si tratta di un antru arnese propiu ineditu da prupone corsi in linea, cuncisi è persunalizati. Eccu, in corte parolle, u scopu di u prugettu messu in ballu sti pochi mesi à l’Università di Corsica. In associu cù a piattaforma di corsi di lingua in linea Gymglish, hà creatu una squadra d’insignanti una versione corsa di stu metudu numericu da permette l’amparera di a lingua corsa à distanza.« Gymcorsu ».
Hè statu iniziatu per via di una dimarchja cumuna trà l’Istitutu naziunale superiore di u prufessuratu è di l’educazione (INSPE) di Corsica, a Facultà di e Lettere è l’UMR LISA. Per sta rientrata di sittembre, serà prupostu st’arnese innuvante à tutti i studienti chì approntanu a certificazione di lingua corsa, da u livellu A2 ver’di u livellu B1, cum’elli sò stati definiti inde u quadru europeu di riferenza per e lingue. Si tratta in fatti d’una seria d’esercizii in linea, scritti è audiò, chì sò pruposti per via di un accessu di quindeci minuti ogni ghjornu. Micca di più. U scopu hè di prupone una furmazione cumplementaria à quella più classica, inde e sale di corsi, è adattata à u prufilu di ogni studiente. « A logica cunsiste dinù à trapassà una visione accademica tradiziunale per mette à prufittu unepochi d’arnesi novi da fà evuluà a furmazione », spieca Dumenica Verdoni, prufessore à l’Università di Corsica è capimachja di stu prugettu pedagogicu. L’ambizione hè di tuccà un publicu più largu. Cù Gymcorsu, si tratta per quist’annu d’una cinquantina di lezziò, spartute trà e duie varietà e più impurtante di u corsu, u pumuntincu è u cismuntincu. « Avemu circatu à rispettà a pulinumia, ma hè statu dinù adupratu stu metudu da pudè mette in valore a cultura, al di là di a lingua, da ch’elli pudessinu piglià cuscenza l’amparanti di l’inseme di e varietà di u corsu », accerta Dumenica Verdoni. Conta assai nant’à st’arnese l’Università di Corsica da sviluppà e cumpetenze di i so studienti in quantu à a cursufunia. Quist’annu duverebbenu esse circa 2000 à seguità una furmazione à distanza per via di Gymcorsu.
À longu andà, u scopu serà di mette st’arnese novu à dispusizione di un publicu di maiò assai più largu. « Si scrive propiu st’arnese inde a strategia di l’Università per custruisce e cundizione d’una sucetà bislingua, spieca Dumenica Verdoni. Hè per quessa ch’ellu serà dinù prupostu à l’intraprese è à l’amministrazione chì si volenu impegnà inde una dimarchja di furmazione di i so persunali.
