Nutiziale culturale

Jardiner bio en Corse, u novu libru di Louis Pietra

Louis Pietra, originariu di Petra di Verde, hà scrittu u libru di giardinaghju “Jardiner bio en Corse”. Ci si trova descrizzione d’ogni legumu o arumatu cù a so traduzzione in corsu, ma dinù cumpusizione nutriziunale è cunsigli : sapè quandu è cumu suminà secondu a luna, i suvi, a rutazione di e culture. Cumu prutege u so ortu da i parasiti, e malatie…

Louis Pietra, di u veru nome Louis Rutherford, hè dinù canterinu è chitarristu. Hà cumpostu è scrittu più di 300 tituli in corsu è in francese, è fundatu in u 1980, u gruppu Pietra cù Yvan Ambroselli è François Ettori. Arrigistreghjanu un primu dischettu in lingua corsa. Cantanu in Corsica è nant’à u cuntinente à u Bataclan, assicurandu e prime parte di cantatori cume Lio o Gérard Lenorman... In u 1982, Louis Pietra crea u studio d’arrigistramentu “Fà diese Corsica” induve numerosi canterini è gruppi corsi ci anu arrigistratu.

A vita hà fattu ch'ellu hè statu custrettu di piantà a musica, per via d’una malatia chì l’impedisce di ghjucà di chitarra. Decide tandu di sprime e so passione da a scrittura.

U libru « Jardiner bio in Corsica » hè a so terza opera scritta, dop’à una racolta di testi è canzone chjamata “De Corse et d’ailleurs” è un libru di macagne, pensamenti, dettu “Tais-toi et lis”.  U giardinu hè a so seconda passione dop’à a musica.

Louis Pietra serà prestu l’invitatu di Voce Nustrale per cronache stratte di u so libru è fà pruffittà l’auditori di i so cunsiglii schjariti.