Nutiziale culturale

L'Alba in scena à u cuncorsu di a migliore curale regiunale nant'à France 3

U gruppu L’Alba in scena riprisenterà a Corsica à u cuncorsu di a migliore curale regiunale nant’à France 3. Dece regione francese sò riprisentate. L’emissione hè presentata da Cyril Féraud è a ghjuria hè cumposta da l’anziana Miss Francia Mareva Galanter, u canterinu Vincent Niclo, u ghjurnalistu spurtivu Laurent Luyat è l'anticaria di l'emissione “Affaire conclue” Caroline Margeridon. Da quì à una decina di ghjorni, i canterini, Marc Pittoru, Nicolas Careddu, Thomas Lovichi è Fred Bichet anderanu à arrigistrà l’emissione in Strasbourg in e cundizione di u direttu. U gruppu L’Alba in scena avia fattu u casting di The Voice dui anni fà ma senza riesce. Sta volta ghjè a pruduzzione chì l’hà cuntattati. 

Qualchì settimana fà, anu participatu à una ghjurnata di rializazione in sfarenti lochi di Purtivechju pè spiecà u so percorsu, mustrà ciò ch’elli sanu fà. Una ghjurnata appena cuntrariata da a grandina, ma cù un spiritu di cantu è di macagna. In Strasbourg, canteranu “L'anniversariu di Minetta”, è “L'altu pratu” s’elli sò selezziunati pè a seconda parte. Participeghjanu à stu cuncorsu pè prumove i so canti più chè pè vince. L’emissione puderebbe esse diffusata à u veranu.