Nutiziale culturale

Legitimità à l'intoppu, u novu libru di Alain-G.Gagnon

Un libru di Alain G Gagnon “legitimità à l’intoppu” à l’edizione Albiana traduttu in corsu da Ghjacumu Thiers. Eccu a terza parte di a riflessione cundutta dapoi anni è anni da l’autore di u Quebec Alain-G. Gagnon, prufessore di Scienze pulitiche à l'Università di u Québec in Montréal. E rilazione pulitiche trà Stati è minurità sò custruite ingiru à argumenti sociologichi, storichi, culturali.

Quandu ghjente, minuranze, sezzione impurtante di cumunutà pulitiche ùn ricunnoscenu più, à un regime puliticu datu, a legitimità di fà à nome soiu, a stabilità pulitica ùn pò esse mantenuta chè da misure cuercitive. À parte si d’issu mumentu, un regime pò esse mantenutu, ma a duminazione diventa putenza, un prucedimentu di desintegrazione sucetale s’inizia è a cuesione necessaria à a riesciuta d’un Statu cumencia à sfiluccicà si. 

Dinù custì, per cità à Habermas, « in a misura chì u Statu assume a guaranzia di parà a desintegrazione suciale da u mezu di decisione cunstringhjente, l’eserciziu di u pudere di u Statu tandu hè misuratu à a dimensione d’issa guaranzia; deve esse ricunnisciutu cumu legitimu s’ellu deve durà » (1991: 180).

A legitimità d’un regime puliticu deve andà assai più inlà chè l’esistenza è u cuntrollu di l’istituzione rapresentative, benchì quesse sianu fundamentale per assicurà a so stabilità pulitica. Quantunque, secondu u principiu di u custituziunalisimu, un certu numeru di cundizione devenu esse riempiute. Cunsidereghju sempre ch’elle sò capitale in qualunque rilazione durevule trà partenarii custituziunali, ste quattru cundizione quì: a cuntinuità storica, l’accunsentu puliticu, l’ospitalità è a reciprucità. Aghju ragiunatu à bastanza longu d’isse quattru cundizione in Al dilà di a nazione unificatrice : argumenti pè u federalisimu multinaziunale è in L’Età di l’incertezze – i dui  primi libri chì cumponenu stu tritticu.