Nutiziale culturale

Mostra 'Mare è Vinu' à a cantina d'Aleria

A mostra «Mare è Vinu», à a cantina d’Aleria, presenta l’attività viticula di i Corsi è d'Aleria in l'Antichità fendu u paragone trà i metudi di fabricazione antichi è attuali. U presidente di a cantina, Christian Orsucci, n’hà avutu l’idea pè fà sparte à u publicu u so amore di a vigna è di u vinu. L’idea hè diventata rialità grazia à a cullaburazione cù l’INEACEM, l’institutu di studii appiecati di e civilizazione è di i spazii mediterranii è u so presidente Jean Castela. Ci truvemu u spaziu didatticu di a storia di u vinu anticu, a navigazione, u tavulacciu aristucraticu etruscu cù una cullezzione di ceramiche eccezziunale, è chì rammenta a participazione di a Corsica è e di e pupulazione lucale à e grande dinamiche mediterranie. Sta cullezzione di ricunstituzione di pezze di tandu si trova in i più grandi musei di u mondu cum’è u British Museum, u Louvre o ancu a villa Giulia in Roma. Ste creazione sò state rializate da u ceramistu Roberto Paolini.

Avemu dinù i primi passi di a viticultura, e grande dinamiche cumerciale ingiru à u vinu, infurmazione nant’à e metode di vinificazione, di pruvista, di trasportu è di cunsumazione di a beienda di Dionysos in tempu di l’etruschi. Sampieru Mari, guida cunferenzeru è membru di l’INEACEM, assicura visite guidate da u luni à u sabbatu, da 10 ore è mezu à 6 ore è mezu.