Nutiziale culturale

Nova edizione arricchita di l'Almanaccu di Bastia

Hè statu arricchitu di qualchì capitulu l'Almanaccu di Bastia à l’edizione : stamperia bastiaccia. Un’iniziativa di u cumitatu di e feste è di l’animazione di u Patrimoniu di a cità, sott’à a direzzione di u so presidente Battì Raffalli. L’almanaccu hè esciutu in u 2005 è hà ottenutu u premiu di u libru corsu l’annu dopu. Cù sta nova edizione, Battì Raffalli è a so squadra ci facenu scopre 60 pagine nove di fatti storichi, stalvatoghji è illustrazione nove.

Ci si ritrova “Una pagina, un ghjornu” da u primu di ghjennaghju à u 31 di dicembre, cù stalvatoghji, passi storichi. Tante è tante cose chì rammentanu u bellu passatu di a cità cù persunagi bastiacci legendari. Pè rializà stu cumplementu, anu participatu di novu Ghjermana De Zerbi, cercadora è militante di a difesa di a lingua corsa, Jean-Pierre Girolami, capiredattore di Corse-Matin, u giurnalistu Pierre-Louis Alessandri. Battì Raffalli rammenta chì “l'edizione nova di l'almanaccu accrisciuta' palesa fatti storichi accaduti in Bastia ma chì ùn eranu stabiliti in modu chjaru sin’à tandu. Cusì, e storie, i ritratti di i persunagi di a cità ingialliti da u tempu, a macagna, a grande Storia : saperete tuttu nant’à Bastia in stu novu almanaccu.