Nutiziale culturale

Si n'hè andatu Louis Savignoni à cantà in paradisu

U puetu petrulacciu Louis Savignoni, 88 anni, si n'hè andatu à l'altru mondu. Era unu di i più famosi riprisentanti di chjam'è rispondi, capace à manighjà e parolle cum'è nimu fora di i so pari. Passiunatu da a prumuzione di a so lingua nativa è impegnatu à prò di a diffusione di a cultura corsa. Era cunnisciutu dinù pè i so puemi in lingua corsa è un talente strasurdinariu pè ghjustre senza fine cù una lingua corsa ammaestrata d'incantu. Rammentava sempre u so attaccamentu à u so paese di A Petra di Verde cù u so cugnome ch'ellu s'hè attribuitu, u puetu petrulacciu.

Evucava a so figliazione petrulaccia nant'à trè generazione cum'è un omagiu à i so maiò capaci ancu elli à descrive in rime scelte i paisagi, a Corsica prufonda è e tradizione multiseculare chì facenu a nostra identità culturale. Hà scrittu e so opere in a racolta di puesie 'Canzone'. Parechji attori culturali, cum'è Paulu Santu Pariggi, senatore di Cismonte è praticante di u chjam'è rispondi, li anu resu omagiu nant'à e rete suciale : ' Luiggi Savignoni s'hè avviatu versu u paradisu di a puesia corsa. Quassù impruviserà cù Pampasgiolu, Minellu, U Furcatu, Babbu è tant'altri... Un puetu ùn more mai.'