Nutiziale culturale

Strade 26, omagiu à u geograffu Pierre Simi

U numeru 26 di a rivista Strade, à l’edizione ADECEM-Albiana hè un omagiu à u geograffu Pierre Simi. Hè natu u 23 di maghju di u 1911 in Port-Saint-Louis du Rhône. Dopu à i so studii in Bastia, hà ottenutu u bascigliè in u 1931, è una licenza di storia-geografia. Hè prufessore in Liò è Montpellier sin’à a so mubilizazione in u 1939.

Fattu prigiunieru in u 1940, fughje da un campu allemanu l’annu dopu è si piatta in Corsica. In u 1942, hè numatu à u liceu di Bastia. Ci stà sin’à a fine di a so carriera in u 1971.

Dice Philippe Peretti, aghjuntu à u merre di Bastia, « Pierre Simi hè un grande prufessore è geograffu. Hè l’autore d’un famosu documentu, a so tesa di dutturatu intitulata :  «L’adaptation humaine dans la dépression centrale de la Corse» ch’ellu publicò in u 1981

U 2 di ferraghju di u  1961, hè statu elettu presidente di a Sucetà di e scienze storiche è naturale di a Corsica. Un omagiu li hè resu da Joseph Palmieri –prufessore di storia à u liceu di Bastia è cofundatore dapoi 1961- ( bulletins  n° 708-709,  n° 710-711,  n° 712-713).

 « L’opera geografica di Pierre Simi hè stata rializata nant’à più o menu 45 anni (1954 sin’à a so morte in u 1999). Qualchì libru hè essenziale cum’è Le Climat de la Corse, l’Adaptation humaine dans la dépression centrale de la Corse (thèse de doctorat), l’Atlas scolaire de la Corse è a so opera fundamentale, u Précis de Géographie de la Corse. In più, numerosi articuli, studii, sintesi diverse, travaglii nant’à i vini d’appellazione d’origine cuntrullata, prublemi d’ambiente cuncernendu u tigliu, u scandalu di e “fanghe rosse” in u 1972  in Corsica  »… L’opera di Pierre Simi si stende à tutta a geografia di a Corsica, cunsiderata secondu i criterii di a geografia muderna, scienza di sintesi studiendu i raporti trà l’omi è u so ambiente fisicu”. In stu numeru 26 di a rivista Strade truverete frà altru e cuntribuzione di Francis Beretti, Denise Viale, Michel Leenhardt, Jean-Paul Giorgetti.