Nutiziale culturale

Sur les terrains du discours corse, u novu libru di Sébastien Quenot

U sintimu d’appartenenza à a Corsica pè i corsi chì campanu fora di l’isula si manifesteghja cù amicale, riviste è giurnali cumunitari. Oghje, stu sintimu ùn serebbe mai statu cusì forte. Si sprime in sfarente manere, da a pulitica à a gastronumia, a creazione culturale, i prudutti cusmetichi. Avemu dinù un bisognu d’arradicamentu è di differenziazione sprimatu da u Riacquistu. In stu quadru, ci hè dinù u ghjocu à pallò. L’autore si dumanda sì i vestiti tradiziunali di l’identità corsa serebbenu in traccia di mutà cù a maglietta di a squadra, in particulare di u SCB. U ghjocu à pallò rispechja i penseri identitarii, mubilizeghja i so fideli pè fà cumunità.

Pruduce da per ellu un discorsu originale nant’à ciò chè no simu. In Corsica, a squadra bastiaccia hè un ogettu transiziunale di cursitù, un agente di sublimazione di a lotta, di a so cuscenza, di u so spiazzamentu è di a so trasfurmazione. U Sporting hè un modu d’investimentu di u spaziu publicu occupenda a scena mediatica è pulitica. Pè sapè cumu a sociolugia pò permette di capì u fenomenu, ci vole à leghje “sur les terrains du discours corse” di Sébastien Quenot, edizione Albiana. L’autore hè maestru di cunferenze in scienze di l’educazione à l’università di Corsica è rispunsevule di a catedra UNESCO “Devenirs en Méditerranée ».