Nutiziale culturale

Trà Mare è Monti – Architettura è Patrimoniu, mostra à u museu di a Corsica in Corti

Mostra da u 23 d'aprile à u 30 di settembre di u 2022. U patrimoniu hè a testimunianza di una storia è di un’urganizazione suciale, ch’ella sia in a so glubalità o in a so diversità. Frà i varii patrimonii, l’architettura hè quellu chì hà ricivutu a ricunniscenza più anziana è chì hè identificatu megliu. Hè una lascita di tempi antichi o più cuntempuranii. Riprisenta una di e nostre ricchezze culturale di primura è una cuntribuzione maiò à a memoria cullettiva.

Fà una mostra d’architettura à u museu di a Corsica permette di falla cunnosce à u publicu per via di un parcorsu didatticu trà lascita è creazione cuntempurania. Di fatti, tocca à un museu di sucetà di porghje spazii critichi per aiutà à capisce un ambiente, un territoriu è e so creazione umane. A mostra prisenta 20 mudilletti, creazione trà mare è muntagna, trà natura è cultura è 50 futugrafie di u patrimoniu architetturale di Corsica. Avvinghjenu u spaziu di a mostra dissegni di prupurzione maiò per un’immersione in l’architettura di i paesi corsi.