Nutiziale culturale

U castagnu, arburu-mondu : u quintu numeru di a cullezzione Spiega à l’edizione Albiana

A cullezzione Spiega ! di l’edizione Albiana s’arricchisce d’un quintu numeru nant’à u tema di u castagnu, arburu-mondu. Tutti i corsi u tenenu caru pè avelli accumpagnati in tempi di gloria è di miseria. Arburu chì hà mantenutu i corsi ma dinù in leia cù u sviluppu artigianatu è culturale. Ne simu ghjunti à parlà di civilisazione di u castagnu. Simbuliseghja dinù a prutezzione quandu qualchissia s’agrotta in u so cavone. 

Ghjè a storia di sta simbiosi dapoi tanti seculi chì hà fattu di u castagnu l’arburu tutelare di i corsi. L’hà accumpagnati da u veculu à a cascia. L’hà datu à manghjà, hà fattu nasce i scambii è influenzatu l’imaginarii. Ci hà permessu di fà cumunità.

Oghje ghjornu, donne è omi scrivenu un capitulu novu. Di fronte à u cynips, à e nove sfide climatiche, l’energie si mubiliseghjanu, s’avventa un rinnovu. Arburi, frutti, territoriu, cultura. Si tratta di tesse allianze nove, d’adattà è d’innuvà. Quì è in altrò, quandu si parla di castagnu, si parla di storia, di scienza, di sucetà, di creazione, di trasmissione di sapè, via di civilisazione, dunque d’arburu-mondu. Stu numeru hè rialisatu sott'à a direzzione di Vannina Bernard Leoni, capiredattrice cù l'interviste di Carine Franchi, animatrice à Grptcmc-Sindicatu AOP Farina Castagnina Corsa, Achille Martinetti, fundatore di a fiera di a castagna in Bucugnà è Philippe Vincensini, agricultore, capu d'impresa.