Voce Nustrale

Nutiziale culturale

Perelli d'Alisgiani
1u di settembre

Prestu un museu di a casa Grossu Minutu

A casa di u famosu Grossu Minutu in Perelli d’Alisgiani hè stata compra da a cumuna. Ghjè a merressa chì l’hà annunziata à principiu di l’assemblea generale di l’associu Grossu Minutu in cunventu d’Alisgiani. Cusì, st’associu hà da pudè principià u so prugettu priuritariu di riabilitazione di a casa chì deverebbe sbuccà nant’à a creazione d’un museu. Sta bona nutizia hè stata guastata da a sparizione di dui membri di l’associu : Marc Riolacci, di ghjennaghju 2020 è Simon-Jean Raffalli u 5 di ghjugnu di u 2022, tramindui membri d’onore. U 5 di ghjugnu era dinù u ghjornu di a morte di Piero Giovanni Ficoni, dettu Grossu Minutu. Una simbolica assai cumuvente. Jacques Fusina hà resu un omagiu à Simon-Jean Raffalli, l’amicu di tutti è amicu sinceru. Omagiu dinù à Marc Riolacci, u presidente passiunatu di Grossu Minutu. Fermanu tramindui presidenti per l’eternu. Durante l’assemblea generale, hè stata eletta a presidente interimaria Lucile de la Piquelière. I vicipresidenti sò Pantaléon Alessandri, Paul Cesarini è Michel Pietri. Una cumunicazione di Dumè Groebner in lingua corsa cù l’accentu balaninu hà strutturatu st’assemblea generale purtendu l’assistenza nant’à u chjassu indispensevule di e storie à bocca, ogni tantu secularie, tramandate spessu da i mulatteri.


In u cuntestu di ricerche nant’à u Grossu Minutu storicu, l’Accademia Grossu Minutu cerca vechji ritratti di Perelli d’Alisgiani, piuttostu di nanzu l’anni ottanta. L’ogettivu hè di truvà viste nant’à e case nanzu i travaglii di mudernizazione, di mudificazione è ogni tantu di demulizione. Tutti i paisoli sò interessanti, in particulare Casella, particularmente demulitu in l’anni settanta. Ritratti privati, cartuline o altre fonte sò i benvenuti. Ponu esse mandati à dumenicu@orange.fr

Cultura

Mostra André Kertész in Corsica

2 di settembre | Corti

 Indirizzu

Piazza Ghjuvanni Simonetti
20221 Cervioni

+04 95 38 12 83

 Rete suciale

Cuncezzione è realizazione Agence de communication L'Agenza