Nutiziale culturale

Six millénaires en Centre Corse : archeulugia, storia, architettura, tupunimia, geulugia

Stu novu libru hè esciutu da u quartu cullocchiu di u Laburatoriu regiunale d'archeolugia (LRA). Ind’una trentina d’articuli, rammenta a storia di u Centru di Corsica da a prestoria à l’epuca cuntempuranea. À a direzzione scientifica, ci hè Hélène Paolini-Saez, direttrice di u LRA, Élisabeth Pereira a presidente Marie-Madeleine Ottaviani-Spella, maestra di cunferenze emerita in geolugia. In u filu di e pagine, avemu 40 cercadori chì evucheghjanu per esempiu i vasi di bronzu di Capuralinu nant’à a cumuna d’Omessa, u situ d'Aculontra in Gavignanu, Faustina Matra à a battaglia di Ponte Novu, l'occupazione di u Rustinu à u Neoliticu, l’analisi di e ceramiche di u situ di Cariolu in Bisinchi… Pè ogni articulu, ci hè una visione nova nant’à l’occupazione umana di u territoriu. Si n’ampara dinù nant’à u patrimoniu geologicu di a cità di Corti, per esempiu numerose petre sfarente sò state aduprate in i so monumenti. Certi articuli sò accessibili à u publicu, altri abbisognanu d’essesi digià interessati à u sugettu trattatu.

“Six millénaires en Centre Corse” hè un’opera di riferenza secondu Yann Quilichini, ingegneru di ricerca à u CNRS è rispunsevule di u serviziu di microscopia elettronica. “Tratta d'una Storia chì ci cuncerna è chì cuncerna u spaziu ingiru à noi, ghjente chì anu guardatu e listesse cose chè noi oghje. Un libru dà ispirazione, permette di fà un’arretta, pè fighjà megliu l’ambiente”.